لە کاتی بەستنی لەچکدا دەرزییەکی قوتدا
کچێکی شاری قۆنیا لە کاتێکدا دەیویست لەچک ببەستێت دەرزییەکی قوتدا و دوای ئەنجامدانی نەشتەرگەرییەکی سەرکەوتوو توانرا ئەو دەرزیەی لە گەدەدا دەربهێنرێتەوە.
Konya
قۆنیا – AA
کچێکی شاری قۆنیا لە کاتێکدا دەیویست لەچک ببەستێت دەرزییەکی قوتدا و دوای ئەنجامدانی نەشتەرگەرییەکی سەرکەوتوو توانرا ئەو دەرزیەی لە گەدەدا دەربهێنرێتەوە.
ئیلایدا ئادیگۆزەلی تەمەن ١٨ ساڵ، لە کاتێکدا سەرقاڵی بەستنی لەچک بوو لەناکاو کۆخەی دێت و یەکێک لەو سێ دەرزییانەی بەدەمییەوە گرتبوونی، قوت دەدات.
دوای ئەوەی ئیلایدا باوکی ئاگادار دەکاتەوە، باوکی بەمەبەستی ئەنجامدانی نەشتەرگەری دەیگەیەنێتە نەخۆشخانەی تایبەتی فارابی و دوای ئەنجامدانی نەشتەرگەرییەکی سەرکەتوو، دەرزییەکە لە گەدەی ئیلایدە دەردەهێنرێتەوە.
نەشتەرگەرییەکە لەلایەن پسۆڕی نەشتەرگەری گشتیی پزیشکی نەشتەرگەر، بولەنت ئەرەنئۆغڵو ئەنجام درا و سێ کاتژمێری خایاند.
ئەرەنئۆغڵو ئاماژەی بەوە دا کە لە دۆخی لەمجۆرەدا پێویستە بێ ئەوەی کات لە دەست بدرێت ئەو جۆرە کەسانە بگەیەنرێنە نەخۆشخانە، گوتیشی: "لە رێگەی نەشتەرگەری نازوورەوە توانیمان بە سەرکەوتوویی دەرزییەکە دەربهێنین. هەرچەند بەهۆی دەرزییەوە چەند شوێنێکی گەدەی ئیلایدا بریندار بووە. ئێستا ئەو هیچ کێشەیەکی نەماوە و بەمەبەستی چاودێری خەواندوومانە. بیر لەوە دەکەینەوە رەوانەی ماڵەوەی بکەین".
ئیلایدا سوپاسی پزیشکی کرد بەهۆی ئەنجامدانی نەشتەرگەرییەکە بەسەرکەوتوویی و ئاماژەی بەوەدا بەردەوام لە کاتی بەستنی لەچکدا بەدەم دەرزییەکانی گرتووە. بەسەرهاتەکەیشی بەمجۆرە گێڕایەوە: "دوای ئەوەی نانی بەیانیم خوارد، سەرقاڵی خۆ ئامادەکردن بووم بۆ چوونە خولی خوێندن. کاتێک دەمویست لەچک ببەستم سێ دەرزیم بەدەمەوە گرت. لەناکاو کۆخەم هات و یەکێک لە دەرزییەکانم قوت دا، دانەیەکیشیان کەوتە سەر زەوی و ئەوەی دیکەیشیان لە دەممدا مایەوە. دواتر بە باوکمم گوت و هاتینە نەخۆشخانە. لەمەودوا هەرگیز دەرزی بە دەمم ناگرم".