بارزانی پێشوازی لە وەزیری بەرگریی عێراق کرد
سەرۆکی ھەرێمی کوردستان، مەسعود بارزانی پێشوازیکرد لە وەزیری بەرگریی عێراق، عرفان ئەلحەیالی و فەرماندەی ھێزی ئاسمانی عێراق، فەریق روکن ئەنوەر حەمەدئەمین.
هەولێر
سەرۆکی ھەرێمی کوردستان، مەسعود بارزانی پێشوازیکرد لە وەزیری بەرگریی عێراق، عیرفان ئەلحەیالی و فەرماندەی ھێزی ئاسمانی عێراق، فەریق روکن ئەنوەر حەمەدئەمین.
بەپێی هەواڵێکی ماڵپەڕی سەرۆکایەتی هەرێمی کوردستان، لە دیدارێکدا وەزیری بەرگری عێراقی عیرفان ئەلحالی، سەرۆکی هەرێمی کوردستانی لە دوایین پێشھاتە ئەمنییەکان و بارودۆخی مەیدانیی بەرەکانی رووبەڕووبوونەوەی تیرۆریستانی داعش لە ئۆپەراسیۆنی ئازادکردنی مووسڵ ئاگادار کردەوە. ھەروەھا بارودۆخی ناوچە ئازادکراوەکانی مووسڵ و ئایندەی مووسڵ خرایە بەرباس و جەختیش لە بەرەنگاربوونەوە و لەناوبردنی تیرۆریستان و ئازادکردنی ناوچەکان کرایەوە.
لە دیدارەکەدا کە وەزیری ناوخۆ و وەزیری پێشمەرگە بە وەکالەت، کەریم شنگالی ئامادەی بوو، ھەماھەنگیی نێوان ھێزی پێشمەرگە و سوپای عێراق لە پرۆسەی ئازادکردنی مووسڵ بەرز نرخێندرا و جەخت لەسەر بەردەوامیی ئەو ھەماھەنگییە کرایەوە.