Израелските борбени авиони денес бомбардираа и уништија зграда во населбата Хадат во јужните предградија на Бејрут, што го означи првиот израелски напад врз областа по договорот за прекин на огнот меѓу Израел и Либан на 27 ноември 2024 година, јавува Анадолу.

Во соопштението, израелската Армија тврди дека нападнала „инфраструктурна локација во јужното предградие на Бејрут што се користела за складирање на дронови управувани од воздушната единица на Хезболах“.

Претходно во текот на денот израелската Армија издаде наредба за евакуација на жителите од јужното предградие на Бејрут, Хадат.

Во соопштението, портпаролот на израелската Армија, Авичај Адраи, им нареди на жителите од одредена зграда означена со црвено на објавената карта, заедно со околните објекти, „веднаш да се евакуираат и да држат растојание од најмалку 300 метри“.

Зградата, за која израелската Армија предупреди да се евакуира како подготовка за бомбардирање, се граничи со две училишта со голем број ученици, јави дописникот на Анадолу.

Либанското Министерство за образование ги повика образовните институции во подрачјето, кои се под закана од израелски воздушни напади, „итно да се евакуираат“.

„Поради непријателските израелски закани кон јужното предградие на Бејрут и областа Хадат, решивме да ја прекинеме наставата во сите јавни и приватни училишта, средни училишта и стручни институции во овие подрачја, вклучително и во Универзитетскиот комплекс ‘Рафик Харири’ во Хадат“, се вели во соопштението на Министерството.

Во меѓувреме, либанската национална новинска агенција ННА објави дека има жестоки истрели во јужното предградие на Бејрут, иако не го прецизираше изворот на истрелите.

Како што се наведува, истрелите биле истрелани како предупредување за жителите по најновата израелска закана.

Претходно, израелската Армија тврдеше дека две ракети биле истрелани од Либан кон Израел и истакна: „Едната е пресретната, додека другата падна на либанска територија“.

Сепак, либанската група Хезболах уште еднаш ја негираше одговорноста за лансирањето на ракетите, потврдувајќи ја својата посветеност кон договорот за прекин на огнот.

Либанската новинска агенција ННА објави и дека продолжува израелската воена агресија во јужните градови на Либан.

Кревкиот прекин на огнот беше во сила во Либан од ноември, со што се стави крај на повеќемесечната прекугранична војна меѓу Израел и Хезболах, која ескалира во целосен конфликт во септември.

Либанските власти соопштија за над 1.250 израелски прекршувања на прекинот на огнот, во кои се регистрирани најмалку 100 жртви и над 330 повредени.

Според договорот за прекин на огнот, Израел требаше целосно да се повлече од јужен Либан до 26 јануари, но рокот беше продолжен до 18 февруари, откако тој одби да го исполни. Сè уште има воено присуство на пет гранични пункта.